OSKATXE
(B.L.)
-Instrumentala-
DENBORAK
(B.L.)
Denborak aldatzen dira
denborak aidatzen doaz
denboragileak ari dira
denbora berria prestatzen;
eta zu, jadanik,
hezituta zaude
zure denboraren ariketarako
gizalege berrien baitan sinismen lausoz.
Eskaparate berria irikita dago,
bertan, izkribu dizdiratsuan
irakur dezakezu:
" etorkizuna zurea da",
eta atzekaldean,
mundu koloretsu bat dago
eta zureganatu nahi zenduke
zure bizitzaren arrastoa uztearren.
Sartuko zara;
eta esku batzuengandik
zure denbora ttipiaren araudia
jasoko duzu;
eta oroimena,
arriskuaz ohartarazteko sortua zena,
garaiko xedeak bereganatzen
lanpetuegia izango da ta
etzaitu ohartaraziko
laberintoaren atarian zarenean.
Eta denborak aldatuz joanen dira;
denboragile berriek
liluramendu berriak sortuko dituzte,
eta zuk,
zure denbora zaharkituaren hatzaparretan,
auzirik gabeko gudaria,
menpeko aberea,
nehoiz ulertu gabeko
askatasunaren kantura
joko duzu,
bizitza iheskorraren
ardo mikatzetik
edaten duzun artean.
Eta zure denboraren ikuspidea
duzula esango duzu.
Bainan, zilegi bekit esatea,
ez dela denboraren morrontzarik
deus adierazi duenik;
eta edozein argi izpiaz
ohartu ahal izan zinenean,
hura, ernaitasun domagaitzetik
jalgia izan zen.
O'CAROLAN I
(O'Carolan)
-Instrumentala-
MAULEKO BIDEAN
(B.L.)
Itsasoari,
maiz zioat galde egiten hitaz O'Carolan,
baita haizetan inprimatzen duken
musikari ere hire gogoetaz.
Oroitzen al haiz,
Luxako Jaun Baruaren eztaietan,
Ezpeldoiko hilketaren berri
eman hidala ixilka...,
Bereterretxen azken atorrean
heriotz koblak biltzen hituan artean...?
Gero Gratxinarekin
Lohia ondartzara joan hintzen
gauerdiko dantzari lotzera.
Bazekiat jakin ere
Eskoziako errege-alabaren bila
izan hintzela Mundakan
eta arrantzale galduen itsasontzietan,
brankaz,
emakumen lurretara abiatu zinetela
itsasoan musikaren uhera luze bat utziaz.
Geroztik,
Quinperako merkatuan,
Gunar erregearekin
izkutu ahalmenen lehiaketan
ikusi omen haute,
hark ankaz jotako arpak
sugeak uxatzen zituen artean,
hire arpegioetan
denbora gelditzen zelarik.
Gurpil hildo marratzailea
landak gorrituz zijoak,
ete ni,
aspaldian hemen niagok Txahorekin
Mauleko bidean hire zai, O'Carolan,
ahaztu lurretara kantatzera
abiatu nahian.
O'CAROLAN II
(O'Carolan - Arty Mcglynn mirestuz)
-Instrumentala-
MUTIL DANTZA
(Herrikoia - B.L.)
-Instrumentala-
PARTITU GINEN
(Herrikoia - B.L.)
-Instrumentala-
FORMAK
(B.L.)
Formak onak dira
haietan galtzen ez zaren artean. (bis)
Hogei urtez egon nintzen
eskaparate batean,
desafiozko begiraden aurrean.
Segurtasu beharrez
hainbat
forma saiatu nituen..., (bis)
jatorrizkoez ahaztu nintzen.
Kantari historikotzat omen naukate,
agian bitrinen bat dut itxaroten,
libra nadila horretatik gutxienez
eta urra nezatela
larros-arantzek azkenerarte.
Formak onak dira, bai,
baldin eta haietan
ez bazara galtzen...
fometan ez bazara galtzen...
NAIZENEZ GERO
(B.L.)
Naizenez gero, merezi luke
izatearen mugagabean galtzea,
adimenaren hegoak
zabaltzearekin
funtsezko keinu sakratua aginaz,
bizi arrazoi guztien gaindi.
Egin bideak baztertuz,
beste bat hautatzerakoan
ohartuko banintz
hastapen amaiera arteko denborak
mugatuko nauela...,
bakartasunetik iheska
bakardadean galdurik,
beldurraren irri krudelen menpeko,
sinismen eta itxaropenen
zutaberik gabeko aterpetan
babestuko naizela...,
ohartuko banintz,
ene baitan
askatasun irudikatua marraztuz,
ametsen argi izpiaren eskutik
bidez bide eginiko laberintoa
nintzatekeela...
Egin bideak baztertuz,
beste bat hautatzerakoan
une batez geldi banendi...,
eternitatea litzateke une hori.
ENE IZAR MAITEA
(Herrikoia)
-Instrumentala-
ITZALTZUTIK ITZULIAN
(B.L.)
-Instrumentala-
BERA
(Silly Wizard - B.L. - J.R.Uriarte)
Iriki nuen atea,
sartu nintzen zu maitatzera
eta ispiluak zure lepoan
eraztunak dizdiratu zituen.
"Hori ba da zure amodioa,
hori zure grina", esan zenuen.
Iriki nuen atea,
desiozko irudiari hurbildu nintzaion
eta oin-hatza xuriak ikusi nituen
zure gorputzean.
"Hori badakusazu nigan eta ez ni",
esan zenuen.
Iriki nuen atea iriki ere,
ilargiaren gelan eta Suffolkeko pitxarrean
sartu nintzen.
Eta esan zenuen:
Oi zein herri bitxia zurea,
jakindurizko begirada eta ikuspegi osoa duen
gizonari BOBO deitzen diona.
Maitatuko zaitut baldin eta,
bara bezala, galtzerdi xuriz
eta urrez bordatutako terziopelo gorriz
jazten bazara.
Maitatuko zaitut, dantzari xuxen horrek
nere ispiluaren aurrean dantzatuko duenean
eta neure gainean maitatzera erortzean
ni musukatuz zure ezpain dardartietan
istua botako duenean zure ezpainetan.
Oi zein herri bitxia zurea,
zuhaitz artean eguzkirik gabe,
xaguxarra bezain airos dantzatzen duenari
BOBO deitzen diona.
Iriki nuen atea.
Sartu nintzen zu maitatzera.
Eta gela, bera gorputz sutsuez
argiturik zegoen gorputz sutsuez.
Haizea ziztuka, hormarik ez.
Zuk maite zenuen
eta ni bere begiradaren aurrean
erortzen nintzen.
Berak besarkatzen zintuen bainan nik,
ene erortzean
ez nuen haizearen
fereka baizik sentitzen.